Charta qua Constantius de Pontel dat monasterio Cluniacensi alodium suum in villa Bussedo.
Ego Constantius de Pontel dono Deo et Sancto Petro, et ad locum Cluniacum, alodum meum qui est in villa Bussedo, ea convenientia ut quamdiu vixero teneam, et omni anno, in vestitura, IIIIor denarios persolvam. Post mortem vero meam, ipsum alodum ad locum Cluniacum ex integro perveniat; et faciant monachi ex eo quicquid voluerint.